ЛЕМКОВСКИЙ ДУХ ЖИЄ НА ВЫГНАНЮ




Минуло десять літ с того часу, як Польске Народне Правительство насильно, при помочы войска, полиции и другых нечистых сил, котры укрывалися за тым красивым названием правительства, выселило всіх лемков зо сво-йой родной отчизны Лемковины, и роскинуло их по западных просторах державы, отзысканых от німцев. Тоту нечестну акцию ріжны польскы урядникы, отвітственны за насильне выселение лемков, объясняли каждый по свому, так што получилася ціла вавилонска вежа причин. Одны объясняли, што лемков выселили за кооперацию с УПА, другы, што лемкы не хотіли голосувати за правительством, третьи, што не хотіли организувати колхозов, знова иншы ставили причины "милосердия".
"Лемков, - - повідают, переселили в ціли охороны их перед немилосердными бандами УПА, або же лемкам уж пришол час дати ліпшы земли, ліпшы халупы, як они мали, ближе индустрии и школы. Одным словом для добра, для уліпшения их житья..."
За тых первых десять літ всьо то вывітрило, бо показалося, што в УПА брали участь многы полякы, а горьше тото, што люде, котры в день были урядниками а в ночы спольниками УПА.

Йорданске Водосвятие: Лемкы в селі Зимна Вода в Польші на выгнаню.

Выяснилася и тота "милосердна" причина "обдарувати лемков ліпшыми господарками", бо скоро лемков выселили, напоспіх присылали осадников, своих родных поляков на тоты "недобры, бідны землі" на Лемковщину и всякыма новыма законами закріпляли за ними "вічны права" на выдерту из рук лемков землю. Так головна ціль насильного выселения не была нияка причина вины, ани нияка причина милосердия, лем просто нелюдский способ для насильного вынародовления лемков и затертя всіх слідов житья за ними. Но историю с лемками можна поровнати до тых зачаруваных приповідок, от котрых волосы на голові дубом стают. Тот чловек, што здавался убитый на смерть, встає на ногы и хоче дальше жити. Так сталося и с лемками. Тоты похоронены "на вікы" лемкы отворили очы, жиют и приходят до своих сил. Нияк о свойой народной смерти не думают.
А найліпшым доказом того суть и тоты фотографии, котры тут поміщены из представления "Вертеп в Карпатах" и правдивого водосвятия на Йордан. Того дня минувшого року, то-єсть 19 января 1957 року, в субботу на свято Богояления на Западных землях Польщы, в селі Зимна Вода, дньом отбылося тото величаве лемковске торжество водосвятия, а вечером драматичный лемковский кружок поставил представление "Вертеп в Карпатах", а при том выступил с лемковскыма народныма співами и містный хор, котрый существує при драматичном кружку.
И ци то не чудо, зачудуване чудо, для тых, котры с радости затерали рукы, коли лемков переселили, и голосно кричали, же лемкам пришол конец.

ЛЕМКОВСКИЙ НАРОДНЫЙ ТЕАТР НА ВЫГНАНЮ

То єсть заслуга молодого студента Теодора Стеранкы из Бортного, же тут был организованый лемковский драм-кружок на выгнаню. То он в 1955 року поддал мысель бортнянской молодежи зробити представлениє из "Нашой Книжкы" п. н. "Шолтыс". Стеранка мал дост трудностей зо стороны декотрых властей и милиции, але он не здраджувался трудностями, а спокойно провадил начате діло. Поконавшы всі перешкоды, мы достали позволение на отограние представления в июлю місяці 1955 року, то было перше представление послі 2-гой світовой войны.

Члены драматичного лемковского кружка: 1-ый ряд, приклякнули, от ліва: Амроз (Кузяк Теодор), Ангел (Феш Олена), Діва Мария (Стеранка Мария), 2-ий Ангел (Шкурат Анна), Дротар Павлик (Феш Юлиан). — 2-ий ряд, стоят от ліва: Лемко (Стеранка Яцко), Князь Роман (Налисник Ваньо), Лемкиня (Дзямба Штефан), Князь Лев (Стеранка Владимир), Циганка Єва (Шкурат Милька), Король Данило (Блащак Теодор), Мошко (Шкурат Петро), Иосиф (Воробель Теодор), Циган Янко (Мадзик Василь), Дід (Шкурат Ґавриил), хлопец (Горбаль Павло), Циган Сидор (Кузяк Пет'ро), 1-ый Югас (Николай Воробель), Дівча 1-ше (Стеранка Мария), Другого Югаса (Стеранку Ваня) не видно, Циганка Мария (Горбаль Милька); 3-ый Югас (Ожинский Мариян) тыж не видно, 2-ге дівча (Воробель Анна), Бача (Воробель Савко), 1-ший Паробок (Горбаль Ваньо), Другого Паробка и Цигана Йошка — цілком не видно на фотографии.

По долгых часах люде отвыкли от своих культурных розрывок, а коли собране в невеликой світлици вышло на сцену дівча в лемковском строю и задеклямувало верш Ивана Русенка "Шануйме своє", то не єдному стислося сердце и заплакали очы. А коли открылася занавіса и люде увиділи середину лемковской хижы, а в ней лемковске дівча и старого Грица Біду, то каждый вспомнул родне село, а навет забыл на хвилю, же он не дома.
Другу штуку мы выучили "Як молоды старых ошукали", с котрым мы были в кількох селах, де єсть більше лемків. За нашым прикладом пішла и лемковска молодежь из села Флоринка, котры гев суть на другом селі Михалові. Они выучили першу "Проспериту", потім "Мачоху", с котрым были запрошены до нашого села. Барз ся людям подабала. Дальше пішли лемкы с Бортного, котры суть в селі Бучинкы. Они выставили "Карпато-русскы Патризаны".
До представления "Вертеп" не могли мы ся перше заберати, бо не было отповідного поміщення ани сцены. Але в 1956 року, старанием цілого села отбудували лемкы из села Лісец власным коштом велику галю зо сценом, котра была страшно зруйнувана, не было нич, лем голы стіны. Так теперь уж мож было братися до "Вертепа", але треба 27 людей, а тилько молодежи не старчило. Але пару старшых газдів згодилися взяти участь, а за режисера аматор Иван Дутканич, воспитанник Русской Бурсы в Горлицах. Так под його руководством почали мы учити "Вертеп". Не мали мы ани потребной одежи лемковской. Женскы лахы гдекотры газдыні ище мают, особливо старшы, але хлопской неє нигде. Мали мы лем єдну чугу, котру єден газда лишил на памятку по своим няню. За старанием воєводского правления нам приділили пару тысяч злотых на полотно на холошні, гунькы, друшлякы (лайбикы), а тоже и скоры на керпці и полотно на декорацию, кулісы и куртину. Но декорацию намалювати не было кому. Я покус брался до мальваня, але на папери, а на полотні чисто друга річ. Але не было рады. Купили мі звычайной фарбы покостовой, што до дерева. Я выліз на драбину и зачал мазати по полотні.
Нияк мі то не ишло, але по двох днях роботы вымучил єм штоси, што уж было подобне до горской околиці, поросненой лісом. Всі орекли, же може быти, а навет, же гарді ся презентує. Так ся ище додало де-не-де березку, ту кряка, там хмару на небі и декорация готова.
Надышол день Йордану, день представления. На запрешение люде сьізжалися зо всіх сторон на піше, роверами и фурами, як на отпуст. За кулісами готовилося представление. Знервованный режисер И. Дутканич літат от єдного до другого актора, ту поправит, там припомне, што треба. Людей много, а кто знає, як піде саме представление, бо більшость перший раз на сцені, може ся помылити. Має ся чого непокоіти. Треба перше привитати присутных. Я вышол на сцену перед куртину, а ту як бы мя дакто за горло вхопил. Пару секунд я стоял без слова. Велика галя, понад 400 людей, была заполнена народом. Могли быти лемкы с Бортного, Флоринкы, Регетова, Щавника, Новой Веси, Верхомли; украинці из Холмщины и Любельщины, а были навет лемкы и с России, котры пришли на отвидизы до своих близкых. В коротшх словах я привитал присутных и начался перший акт. При ко:трі сідит бача в чузі, а югасы співают. При блеску ватры блищат, як золото гузикы на друшляках. Начинатся чардаш. На сали тихо, як бы заворожил. При другом акті больше гумору в публики, што хвиля голосный сміх.

Члены хора — (з ліва на право): Мадзик Василь, Феш Анна, Горбаль Теодор (не видно), Шкурат Милька, Шкурат Гавриил, Дзямба Штефка, Стеранка Ганя (она деклямувала верш "Лемковина" Ивана Русенка, Стеранка Мария, Воробель Николай, Горбаль Милька, Стеранка Ваньо, Воробель Анна, Ожинский Мариян и Иван Дутканич, режисер представления.

Третий акт был направду урочистый. Знов тишина на гали, як при акті першом. Ясла освічены ружовым світлом, выглядают пречудно. Рожисер задоволено затерат рукы, подсміхуеся добри пішло. Люде задоволены. Ище єдна коляда и конец представления. На сцену выходит наша капеля и люде бавятся до поздна в ночы.

Теодор Кузяк

КАРПАТОРУССКИЙ КАЛЕНДАРЬ — 1958


Icon Return to Lemkos Home Page

Document Information

Document URL: http://lemko.org/selo/zymna_woda/index.html


E-mail: walter@lemko.org

Copyright © LVProductions, Ltd.

Originally Composed: July 9th, 2003
Date last modified: