З іницятивы Осередка Культуры Православной в Горлицях на Лемковині, в 55 річницю Акциі "Вісла" розпочато ремонт старого цмынтеря в селі Радоцина. Радоцина до 1945р. была велкім лемківскім селом розложеним при самій границі з Словацийом. По сусідскы были села Конечна, Долге і Липна.
В 1945р. вшыткых жьітелів вивезено на Україну. Пару родинам вдалося вернути домів, але юж в 1947р. зас виселено іх, тим разом на Західні землі Польщы. Хыжы і церквы (была грекокатолицка і православна) розібрали осадникы. Гнеска о тим, же існувало ту даколи село і жыли ту люде, сьвідчат лем стары здичали овочовы дерева, придорожны кресты та знищений цмынтір. Без довгы рокы цмынтір был нищений і профануваний през гуралів якы випасают тепер в Радоцині уці. На цмынтері заховалося до гнес 24 камінны памятникы, вшыткы знищены, розбити, поперевертаны.
З волі Божой того літа вірны горлицкой православной парафіі викосили траву на цмынтері, витяли непотрібны дерева і галузя, єдним словом упорядкували сьвяте місце. Ріжницю пред ремонтом і по мож взріти на знимках.
Наступні Осередок зорганізувал табор для молодежы під доглядом консерватора штукы камінной Пана Шимона Моджеєвского. Молодеж гарді, фахово посклияла кресты, обчыстила з моху, випростувала тоты котры были скрывлены-похылены. Одремонтувано вшыткы крести. Чудово виглядат тепер найвекшый крест, праві штырьометровий, на котрым Радоциняне з Украіны поставили памятну таблицю.
Треба сердечно подякувати о. Романови Дубецови, котрый керує діяльністьом Осередка Культуры Православной в Горлицях, за інициятиву ремонту і же нашол
спонсорів (м.ін. Фундация Баторого), добрых люды, котры помогли місце вічного спочинку нашых предків упорядкувати. О. Роман хоче іщы огородити цмынтір, на разі бракує грошы, але майме надію, же і тоты пляни завдякы його оперативности, ся сповнят.
Щесты Вам Боже.
Роман Поповіч            Антифон #2-3, 2002.


bear

Document Information

Document URL: http://lemko.org/selo/radocyna/index2.html

       Return to Lemko Home Page

Date Posted: October 18th, 2002
Last Revision:


LV Productions
c/o Walter Maksimovich
3923 Washington Street,
Kensington MD 20895-3934

USA
© LV Productions, Ltd. All Rights Reserved.