ПІЯВКЫ ПОМОГЛИ
- Но, то як там мі жыєте, кумо? Бо єм вас дост довго не віділа - зачала бесіду Фенна.
- Є, та добрі - одповіла Єфроска. Коровы ся нам обі потелили, и компері зме юж окопали.
- А як там, кум ся тримают? - цєкавит ся дале Фенна.
- Йой, знате кумо, же штоси му докучат. Гнес ани до церкви не пішов. Деси в тамтім тыжни стрикло го в крижах, и болит го так, же ани спати не годен. Так ночами ся товче и йойчыт, же ани... - скаржит ся кумі Єфроска.
- Знате што, кумо? - радит Фєнна. - А, може бы кумови Лукачови піявкы помогли? Мене тіж так боліло медже плечами, и піявкы мі помогли. Ноле, вступтє до нас, я мам ищы три, то вам дам.
Зашла Єфроска до Фенны, взяла фляшеня обвязане леняном шматком, в котрім находили ся в воді, три піявкы, и пішла радо горі селом домів.
Минуло може зо два тыжні, як Єфроска з Фенном зас стрітили ся коло церкви.
- Витайте кумо, ци сте здоровы, што там чути коло вас? Но, як там кум Лукач? Помогли ім тоты піявкы, штом вам дала? - цекавила ся Фенна.
- Є, та помогли, помогли - Боже вам велике заплат, кумо, зараз му ся поліпшыло! Лем знате - додає Єфроска - на сорово то ледво едну зів, більше за нич не хотів, то тоты дві єм му засмажыла на маслі - и зів смажены, але и так помогло.
Return to Lemkos Home Page
Document Information
Document URL: http://lemko.org/lemko/kuziak/12.html
E-mail: walter@lemko.org
Copyright ® LV Productions, Ltd.
|
LV Productions 3923 Washington Street Kensington MD 20895-3934 USA |
Originally Composed: March 23, 2001
Date last modified: